Mae’r ddarlith gyntaf yng nghyfres newydd Diwinyddiaeth Gyhoeddus Cytûn, Claiming Christianity: the Challenge of the Far Right, a gyflwynwyd gan y Parchedig Dr Helen Paynter, bellach ar gael i’w gwylio ar-lein.
Lansiwyd y gyfres er mwyn annog ymgysylltiad Cristnogol ystyrlon â bywyd cyhoeddus yng Nghymru, gan gynnig lle i fyfyrio ar sut y mae ffydd yn llywio ymatebion i faterion cymdeithasol, gwleidyddol a diwylliannol.
Trwy ddod â diwinyddion ac ymarferwyr parchus i drafodaeth am heriau cyfoes, nod y darlithoedd yw cefnogi eglwysi ac unigolion i feddwl yn ddyfnach am ddimensiynau cyhoeddus y ffydd Gristnogol.
Rhoddwyd y ddarlith agoriadol gan y Parchedig Dr Helen Paynter, Cyfarwyddwr y Ganolfan Astudio’r Beibl a Thrais yng Ngholeg Bedyddwyr Bryste. Mae Dr Paynter yn adnabyddus am ei gwaith ar ddehongli’r Beibl,
cyfiawnder a’r defnydd moesegol o’r ysgrythurau, ac mae wedi ysgrifennu’n helaeth am y modd y caiff y Beibl ei gamddefnyddio weithiau i gyfiawnhau niwed neu waharddiad. Yn Claiming Christianity: the Challenge of the Far Right, mae’n archwilio sut y mae iaith ac hunaniaeth Gristnogol yn cael eu defnyddio mewn dadleuon cyhoeddus cyfredol, ac yn myfyrio ar yr hyn y mae’n ei olygu i Gristnogion siarad yn gyfrifol ac yn ffyddlon yn y sffêr gyhoeddus.
Mae’r ddarlith hefyd yn ystyried y ffyrdd y gellir galw ar Gristnogaeth i gefnogi agenda wleidyddol neu ddiwylliannol benodol, weithiau mewn ffyrdd nad ydynt yn adlewyrchu ehangder na dyfnder y traddodiad
Cristnogol. Mae Dr Paynter yn archwilio sut y mae elfennau o’r dde eithafol wedi ceisio hawlio hunaniaeth Gristnogol er mwyn cefnogi naratifau cenedlaetholgar neu eithriadol, ac yn gwahodd gwrandawyr i
fyfyrio’n feirniadol ar y datblygiadau hyn. Mae’n annog eglwysi i adfer tystiolaeth gyhoeddus gyfoethocach a mwy tosturiol sydd wedi’i gwreiddio ym mywyd a dysgeidiaeth Iesu ac, fel ysgolhaig yr Hen Destament, mae’n myfyrio ar rôl y proffwydi wrth lefaru’r gwir wrth rym.
Bydd cyfres Diwinyddiaeth Gyhoeddus Cytûn yn parhau gyda darlithoedd pellach yn archwilio’r berthynas rhwng y ffydd Gristnogol a bywyd cyhoeddus yng Nghymru. Trwy sicrhau bod y darlithoedd ar gael ar-lein,
mae Cytûn yn gobeithio ehangu cyfranogiad yn y trafodaethau hyn a darparu adnoddau y gall eglwysi, myfyrwyr ac eraill sydd â diddordeb yn rôl diwinyddiaeth yn y sffêr gyhoeddus eu defnyddio. Gellir bellach wylio’r ddarlith gan y Parchedig Dr Helen Paynter, Claiming Christianity: the Challenge of the Far Right, drwy wefan Cytûn.