Mae Cytûn yn cynnig gweddïau a chefnogaeth wrth i’r Eglwys yng Nghymru ethol Archesgob newydd
Wrth i’r Eglwys yng Nghymru ymgynnull i ethol ei 15fed Archesgob, mae Cytûn – Eglwysi Ynghyd yng Nghymru – yn estyn ei gweddïau, ei chefnogaeth a’i hannogaeth gynnes i’r Coleg Etholiadol ac i’r gymuned Anglicanaidd gyfan yng Nghymru. Mae’r foment arwyddocaol hon yn dilyn ymddeoliad yr Archesgob Andrew John, ac fe gynhelir y cyfarfod yn St Pierre Church and Hotel yng Nghas-gwent o 29 Gorffennaf – yn gyfnod o fyfyrio, deallusrwydd ysbrydol ac ymrwymiad.
Mae Cytûn yn dathlu’r rôl hollbwysig sydd gan Archesgob Cymru, nid yn unig o fewn traddodiad Anglicanaidd, ond hefyd ym mywyd cyhoeddus ac ecwmenaidd ehangach Cymru. Wrth i aelodau’r Coleg Etholiadol ddod ynghyd o’r chwe esgobaeth, gan gynrychioli clerigwyr a lleygwyr fel ei gilydd, mae Cytûn yn sefyll gyda hwy mewn gobaith a gweddi. Rydym yn cydnabod y cyfrifoldeb dwys a’r ymddiriedaeth sanctaidd a roddwyd iddynt.
Dywedodd y Parchedig Ddr Jennifer Hurd, Cadeirydd Cytûn:
“Mae’r Eglwys yng Nghymru yn gyfaill gwerthfawr ac annwyl iawn ymhlith y mudiad ecwmwnaidd, rydym yn dal y Coleg Etholiadol a’r rhai sy’n gwasanaethu’r Eglwys yng Nghymru yn ein gweddïau yn ystod y cyfnod hwn o ddewis arweinyddiaeth newydd. Nid moment i’r teulu Anglicanaidd yn unig yw’r etholiad hwn, ond hefyd foment i bob Cristion yng Nghymru fyfyrio ar ein galwad gyffredin i wasanaethu pobl Dduw mewn undod a chariad. Bu’r Eglwys yng Nghymru yn gyfaill ffyddlon i’r mudiad ecwmenaidd, ac edrychwn ymlaen at barhau ar y daith hon gyda’r Archesgob newydd.”
Ychwanegodd y Dr Cynan Llwyd, Ysgrifennydd Cyffredinol Cytûn:
“Mae rôl yr Archesgob yn cario arwyddocâd ysbrydol a bugeiliol dwfn. Bydd Cytûn yn parhau i gydweithio’n agos â’r Archesgob newydd i feithrin cydweithrediad ecwmenaidd, deialog rhwng ffyddau, ac i gryfhau llais Cristnogol cyhoeddus sy’n seiliedig ar dosturi a chyfiawnder.”
Mae Cytûn yn annog ei heglwysi aelod ac aelodau’r gymuned i ddal y broses hon yn eu gweddïau ac i gefnogi ein ffrindiau Anglicanaidd â chariad ac undod. Edrychwn ymlaen at groesawu a gweithio ochr yn ochr â’r Archesgob newydd wrth iddo/iddi ymgymryd â’r arweinyddiaeth, wedi’i wreiddio mewn ffydd ac ymrwymiad i ffyniant yr Eglwys yng Nghymru yn ei chyfanrwydd.